ผญาเกี้ยวบ่าวสาว

2.3 ผญาเกี้ยว บ่าวสาว

2.3.1 ชายหญิง ตัวอย่าง ชาย

นางเอ้ย…บุญหัวหลาย อ้ายจั่งได้มาพ้อ บุญหัวพอ อ้ายจั่งได้มาจวบ มาพบน้องอยู่ปราง มาพบนางอยู่ห้อง มาพ้อ ทองค่าล้าน เห็นแล้ว บ่อยากหนี ซาตามาตกนี้ แม่นจำหนี สิขออยู่ แผ่นดินท่อหมากบ้า แผ่นฟ้าท่อหมากเบี้ย อ้ายขอม้วนกระดูกดอม… เจ้าเอ้ย

ตัวอย่าง หญิง

อ้ายเอ้ย…อ้ายนี้ลูกแต่ห้อง ก้ำฝ่ายแดนใด๋…มานอ อ้ายนั้นลูกแต่ห้อง เมืองใด๋จั่งดั้นฮอด…ขอจ่งบอกให้น้อง พอฮู้ ถือสถาน…แน่ถ่อน หรืออ้ายลุกแต่ก้ำบาดาลเมืองนาค หรืออ้ายลุกแต่ก้ำ สวรรค์ฟ้าฟากพรหม…พุ้นนอ บิดา-มารดา นามใด๋บอกน้องแหน่ หรือว่าอินทร์อยู่ฟ้า เป็นเหง้า…พ่อพี่ชาย

2.3.2 ชายหญิง ตัวอย่าง ชาย

                นางเอ้ย…อ้ายนี้ลุกแต่ห้อง หนองเรือคำ ก้ำขอนแก่น เกาะสายแน ใต้ขอบฟ้า มาเห็นหน้าอยากข่าวถาม ถามข่าวน้อง น้อยนารถนงศรี ยังค่อยสำบายสุข พึ่งบุญพุทโธเจ้า ยังค่อยสุขสำบายมั่น เสมอ มันเครือเก่า  ยังค่อยสุขอยู่สร้าง ศีลสร้อย สุขสำราญ…พี่ฤา

ตัวอย่าง หญิง

อ้ายเอ้ย…น้องยังสุขขีหมั่น สำราญดีทุกอย่าง ศีลธรรมองค์พระเจ้า กะยังตั้งเที่ยงตรง…พี่เอ้ย ยังแต่เคืองใจน้อง นอนเดียวบ่มีคู่…นี้แห เห็นเพิ่นมีคู่ซ้อน โตน้องกะอยากมี…พี่เอ้ย

2.3.3 ชายหญิง ตัวอย่าง ชาย

                นางเอ้ย…อ้ายอยากถามข่าวเคหังห้อง เฮื้อนซานบ้านอยู่…ถามข่าวเฮือน พื้นแป้น เพดานลวดลายคำ หลังคามุงดินขอ ใส่กระแจจำหมั่น ถามข่าวกลอนขื่อค่าว สิยังยาวแปพาด ถามข่าวขางสอดดัง เสาพร้อมพร่ำขึ้นได ยังค่อยเทียระฆาหมั่น ปอคลอนแคลนไหวน บ่น้อ…ยามเมื่อลมพาดต้อง กะยังหมั่ยซื่อตรง…พี่ฤา

ตัวอย่าง หญิง

อ้ายเอ้ย…อันว่าเคหังห้อง เฮือนซานบ้านน้องอยู่ กะยังตั้งเทียงมั่น ลมต้องบ่หงวย…เฮือนพื้นแป้น ฝาตองกะยังใหม่ กลอนขื่อข่าว สะยั้วดั้ง ท่าอ้าย ไปสร้างต่อเติม…อยู่ตั๋ว

2.2.4 ชายหญิง ตัวอย่าง ชาย

นางเอ้ย…อ้ายอยากถามข่าวน้อง ถามข่าวไฮผืนหนา ถามข่าวนาง ถามข่าวนาพื้นกว้าง ยังค่อยสวยรวยข้าว ฮวงยาวเม็ดถี่…อยู่บ้อ ยังค่อยสุขเฮือเข้ม เหลืองกุ้มทั่วท่งนา…อยู่บ้อ

ตัวอย่าง หญิง

โอ้ยนออ้ายเอ้ย…อันว่าไฮ่ผืนหนา อันว่านาผืนกว้าง ทรงดีแต่ทางขุ่ง ทางเขิน บ่มีผู้ช่อยปั้น คันแทน้อยจั่งบ่งาม พอได้กิน ทาน สร้างบ่พอขาย น่ำบ้านเพิ่น…ดอกพี่เอ้ย หากมีผู้ช่วยแฮง หรือมีผู้ช่ายปั้น ขางเล้า ย้านเอ่นกลาง…พุ้นแหล่ว